Pan

Un pan de boa calidade é lixeiro para o seu tamaño, excepto o pan integral auténtico que é máis denso e ten máis peso. A cortiza é lisa, dourada e cruje cando rompe. Si no pan fresco a cortiza despréndese, pódese concluír que o pan estivo conxelado. A faragulla é de textura fina, uniforme, de cor branca ou branco cremoso. O cheiro e sabor do pan son agradables e característicos e non se teñen que notar sabores estraños. Si o pan non está ben cocido, a faragulla ten a tendencia a formar unha masa compacta que pode provocar problemas dixestivos e gases. 

O peso das pezas de pan é un aspecto a ter en conta cando se compra. Os pesos son aprobados por comisións específicas das comunidades autónomas e os fabricantes non poden modificalos pola súa conta.

Unha vez adquirido o pan, é conveniente utilizar unha bolsa -mellor de tea- para que o pan chegue a casa nas mellores condicións hixiénicas e de aparencia. O pan envolto modifica as súas características polo feito de estar envasado; a cortiza abrándase e faise máis elástica pero a faragulla mantense esponxosa durante máis tempo. Por norma, só poden vender pan sen envasar nin etiquetar os establecementos nos que se elabora. En caso contrario, cada peza tense que presentar envasada e etiquetada unitariamente. Nos envoltorios constará serigrafiada, impresa ou etiquetada, a seguinte información: marca rexistrada, nome ou razón social ou dirección do fabricante, denominación e peso neto do produto, data de produción, fórmula cuantitativa e cualitativa do produto e todas as especificacións que esixa a norma técnico-sanitaria correspondente.

Os establecementos de venda deben dispor dunha balanza á vista do público e o consumidor pode pedir a comprobación do peso das pezas.

O pan experimenta un proceso de envellecemento a consecuencia do cal a faragulla se vai endurecendo mentres que a cortiza se fai máis branda e elástica, á vez que perde aroma. Este proceso débese a fenómenos de modificación do almidón. No envellecemento inflúen a consistencia, o tipo de fariña, a forma e o seu proceso de cocción, así como as condicións de humidade e temperatura nas que se conserva. O pan envasado tense que desenvolver ao chegar a casa, e os pans que xa se abriron para o seu consumo pódense recubrir cun trapo de tea para evitar que se sequen.

O pan non se ten que gardar no frigorífico; o envellecemento é moito máis rápido a temperaturas de refrixeración. Pola contra, a conxelación é un bo procedemento para conservalo. Convén conxelalo en porcións que se poidan consumir dunha soa vez. A descongelación pódese facer introducindo o pan nun forno quente ou deixalo a temperatura ambiente durante unha media hora se está cortado en porcións.