Lekaleen eta zerealen konbinazioa

Herritar askok behar baino zuntz gutxiago kontsumitzen dute, eta, beraz, gehiago hartu behar dute; hau da, elikagai gehiagok ematen dute. Adituen iritziz, helduek egunean 25 eta 30 gramo zuntz artean hartu behar dute.

Behar adina zuntz hartzeko, aski da egunero hartzea: 3 fruta ale, entsalada bat eta barazkiak edo lekaleak. Osoko zerealek ere (arroza, adibidez) zuntz asko izaten dute, eta osoko zerealekin egindako produktuek ere bai (ogia, biskoteak, gosaritako zerealak, pasta).

Osoko zerealen eta lekaleen konbinazioa, berez, aukera osasungarria da, eta zuntza ematen dio dietari. Zehazki, edozein lekale (50 gramo gordinik) eta arroz integrala (30 gramo gordinik) dituen plater batek 10-12 gramo zuntz ematen ditu; pertsona batek egunean behar duenaren herena.

Zergatik da zuntza hain onuragarria osasunerako?

• Idorreriari aurre egiten laguntzen du, baita hemorroideak eta dibertikulosiak izateko arriskua gutxitzen ere.
• Odoleko kolesterol guztia eta LDL-kolesterola (txarra) gutxitzen ditu: egunean 5-10 g zuntz disolbagarriko dieta egiteak %5 murriztu dezake kolesterol txarra.
• Asetasun-sentsazioa areagotzen du. Pertsona denbora gehiagoz "beteta" sentitzea ahalbidetzen du, hustuketa gastrikoa moteldu egiten baita, eta, ondorioz, otordu arteko gose sentsazioa atzeratu egiten da.
• Koloneko minbizia nozitzeko arriskua arintzen du: dieta guztiek kartzinogeniko izan daitezkeen konposatuak dauzkate, zuntzarekin nahastean hesteetako paretak ukitzen ez dituztenak eta xurgatu ezin direnak, hesteetako zelulei eragiten ez dietenak.
• Diabetesa daukanaren dietan elikagai gehiago sartzeko aukera ematen du: prandialaren osteko odolean (jan ondoren) glukosa eta intsulina mailak murrizten ditu, zuntzak irentsitako elikagaien karbohidratoen xurgatze abiadura moteltzen duelako, jan ondoren odoleko glukosa mailaren bat-bateko igoerak ekidinez.